سلك عريان

سلك عريان



أقولك حكاية


يمِكن متصدقهاش


النور قاطع ف شارعنا


من سنين ولسه مجاش


عارف ليه


آه والعيش والملح


زى ما بقولك كده


ودوَّرنا كتير مخلَّيناش


وملقيناش


غير سلك عريان مكشوف


واقف ف العتمة مكسوف


ساكت آه


لكنَّه مبينساش


لمَّا الماسورة اتخرمت


وربطناها بحتة قماش


ولكل جرح بينزف


شوية ب


ولو البن غالى بلاش


إيه ياعم


إحنا كل ده ف ميدان التحرير


لسَّه متحركناش


آه والعيش والملح

سلطة

سلطة



أحْلامْنا سَلَطَةْ


وكَلامْنا سَلَطَةْ


والعشق وَرطَةْ


غِلط غلْطَةْ


كأَنَى ماشى من غيرْ دِماغى


كأْنى أقف أدَّن فَ مالَطةْ


سَلَطَة


وتَملىِ خَسْ وجَزَرْ


ناديتُه لَكن راح واعتذَرْ


أَلاقيش مَعاك سنةْ أمل


ألاقيش مَعاك حَبةْ نْظر


اليُوم وفاتْ


وبُكرَه فَاتْ


مَفْضلِشْ غير


حَبةَ سُكاتْ


وتقولِلى هات


أحَلامنا ليهْ


سلطة

أه .. يا ضهري

أه .. يا ضهري

تحس إن البلد بتصحي م النوم


بتقول آه يا ضهري


شعرها منكوش


وصوتها مبحوح


كأنها كانت نايمة


ف عشة الفراخ


اللي فوق السطوح


وتسند علي مين


ده الكل مدبوح


لا ضل راجل


ولا ضل حيطة


مفيش غير شوية زيطة


تيجي شوية


وبعدين تروح

رقـــــم

رقـــــم




إِحْنا


يَا دُوبْ رَقَمْ


والماتش شَغَّالْ


فاوِلْ مفِيشْ


آوِتْ مفِيش


ومَفِيش ضَربِة جَزاءْ


وكل يومْ مُوضَة


وكل دقيقَةْ عرَض أزْياءْ


وكل شئ للبِيعْ


ومفِيشْ أكتر مِن الأسواق


إيهْ يعمل الأدبْ


وإيه تَعمل الأخلاق


فِى ماتشْ


مِن غيرحَكَمْ

حظك اليوم

حظك اليوم



حظك اليوم

زي إمبارح

زي كل يوم

ومفيش حاجة متغيرة

البت الطويلة عايزاك

بس انت عينك ع القصيرة

يا لئيم

بس ابن حلال وطيب

وتِستاهل كل خير

وحتة سكرة

شوف

الزهرة مع مريخ وعطارد

وشوية كَواكب كَده

عاملين معاك شغل

آخر مسخَرَة

تطلع من إنتخَابات

على استفتاءات

وَحَاجَات ومحتاجَات

وبيع وسَمسَرة

وإنتَ ما شَاء الله عليِك

غزال يا ربى

لا هَمك إشارات

ولاَ مطبات

ولا شَوَارع مِكسرة

شوف التعليم

زي القديم

والصحة ربنا يستر

متتخضش كده يا عم

إيه يعني اللي جرا

عَنَدك حَاجَات

وحاجات تعديل

وَحَاجَات

تتغير في التوكيل

وحاجات معدتش تنفع خالص

وحَاجَاتْ عَايزَة

بوَية وسَمكرة

شُوف

معمولك عمل مربوط

فِى ديل قرد شَقِى وَمحطوط

فَ حَاجة مدورة

وبعد نقطتين

رايح حتة

الله أعَلَم فِين

لا ليها عُنوَان من قدام

ولا مِن وَرَا

حساس أوي

حساس أوي

إيه يعني ماسورة مكسورة

والميه طَعمهَا اتغير حبتين

متبقاش حساس قوي

نحَلل ونشوف فَيْروس كَده

ولو فيه

الأعْمَار بِيدَ الله

واهى ماشَيهَ ومستورة

وبقالنا سنين بنسدد ف الدين

إن قصر البنطلون

هنفك التنية

وإن كان ع الزَكة اللى ف رِجلْيِك

مَا أنت عندك رجل تانية

متقوليش عينك بايظة

ماهى باينة

مَتبقَاش حَسَّاس أوى كَده

جمهورية إمبابة

جمهورية إمبابة

قالت لي


أنبوبة البوتجاز بتنفس


قولتلها


الحمد لله إن لسه


فيه غاز


ولسه قادرين نتنفس


قالتلي النور قطع


قولتها


يا ستي نحسس


قالتلي


الرغيف اتسخط


قولتلها


فرصة بقي نخسس


قالتلي


مش هاينفع كده


قولتلها ده كده كويس


وطي صوتك


يقولوا علينا عملاء


وخونة وبنتجسس


لصالح جمهورية إمبابة

بيوتنا

بيوتنا

بيوتنا واسعة وضيقة

عصَافير كِتير

ولا يُوم صَحيت م الزقزقة

بحلم بعيشة محندقة

وسط البرَاح

لو كان صَحيح

الحُزن رَاح

طَب ليه الجراَح

لسه فَ عيونَا مخندقة

بيوتنا أسمنت

وزلط وحيطان

وزي الأسى

مترصصة

مرصوصة رص

دَار النهار

من دار لدار

طبل وزَمر

قال وسار

ولا حد حَس

بوابة تفتيش

بوابة تفتيش

بوابة تفتيش على بابك


كل ما احَاول أعدى تزمر


وبتتشرط


وبتتأمر


أرَجَع أدَور تاني وأدور


وكل ما أعدي برضه تزمر


دب أدي الساعة


وأدي حزامي


وآدى بطاقتي


والنضارة


وآدى عنواني


وكل حَكَايَتي


وآدى أمارة


حتى الفكة الباقية في جيبي


والأشعار


والمحفظة مفيهاش غير صورتك


ليل ونهار


كل هدومي


زي ما نازل من بطن أمي


من غير حتى ورقة توت


وكل ما أفوت


البوابة برضك تزمر


ولما لمحني


واحد طَيب م الحراَس


وقَاللي اسْمَعني يا ابن اَلَناس


إرمي الحته الحلوة في قلبك


وعَدى


والبَوابَة عمرهَا


ما تزمر

ختم دخول

ختم دخول



مش معقول



بِيِنى وبِينك ختم دخول



ودول ظباط وعساكر



ولا حبَايب


أنا مِش فَاكِر


أنا مِش غايِب


أنا مِش سايب ولاَ فتفوتة


إيه اَلحدوتة


لِسه جَمارِك


لسه هندخل تانى معارِك


ده أنا مِش مالِك


غَيِر أشواق


الَله يِلعَن أى فراق


بينِى وِبينك


خِتم دخول


مش معقول

زغزغني

زغزغني




زغزغنى


يمكن أضَحَك


يمكن أفرح


يمْكَن أطلَع


مِ الَلى أنا فيِه


زغزغنىِ


يمكِن أحلَم


يمكَن أقَول اِللى مخَبيه


مِش جَايز


لسه الدُنيا جَميلَة بِجَد


ولسه النَاس


فِى الصيِف والبَرد


مِش يِمكن


يطلَع فيا العيِب مِش فِيه


زَغْزَغْنِىِ

غسيل قلوب

غسيل قلوب



هي القلوب بتتغسل


زي الهدوم


وإزاي بتغرق ف الغرام


وإزاي تعوم


وإزاي بتبقي طوق نجاه


وبتبقي شط


وإزاي بتنخل الكلام


وإزاي بتعرف أي خط


وإزاي بترقص م الفرح


وإزاي بتقتلها الهموم


وإزاي بتبكي وتبتسم


واشمعنا يعني بتترسم


فوق الشجر


ساعات بتدبل ف الربيع


وساعات بتعشق المطر


ليه لما بتبطل غونا


بنحس فعلا


بالخطر

زي الجن

زي الجن



ساعات كده بعيد عنك


يجيلي كرشة نفس


وألم ف المعدة


ودربكة ومغص


وساعات أحس


إني شوية أمراض


محطوطة ف قفص


بس ماشي الحال


وساعات من غير سبب


أجري ع الحمام


ويجيلي برد وزكام


وساعات أسهر


وساعات م العصر أنام


وساعات ألاقي


صعوبة ف الكلام


وده تقريباً طول السنة


وساعات أحس


إني مش أنا


بس زي الجن


فاكر اسمي واسم مراتي


وأسامي العيال


وعلي طول بقي


جسمي مكسر ومهدود


صحيح باكل وأشرب


واضحك والعب


بس مش موجود


ومعرفش ليه عيني بترف


عمال علي بطال


هو أنا عندي إيه يا دكتور

الكيلو تسعين

الكيلو تسعين



يكون في علمك


أنا متواضع جداً


ومش طالب كتير


يعنى شقَة صغيِرة


ف الكيلو تسعين


ما هى الحياة مشاوير


مِشِ شرط بَقى بتطل


عَلى جَناين وهوا وعَصافير


وبنت حَلال ومِش شَرط


زَى اللى ف الكليب الأخيِر


وحتة مدرسة صغيرة


أهَى العيال تفك الخَط


ومِش شَرْط لُغات وحرَكات


وجَغرافيا وتعبيِر


وأدْخل القسم


أطلع زي ما دخلت


محترم وكبير

الفاتحة ع الأموات

الفاتحة ع الأموات


وفضلت أستنى أستنى

لحد ما عدى أخر قطر وفات

حزنت

قعدت أعيط أعيط

قلت أتمشى أتسلى

أتفرج ع الشوارع والناس والعربيات

زهقت

قلت أرتاح

سنَدت على روحى

إتلخبَطت جُوايا كل الحَاجَات

مدّيت إيدى ف جيوُبُى

لقيت شوية ورق قديم

وصور وكروت تليفونات

قلت أكلم مراتى

افتكرت إنها خدت الدوا

ونامت من تلات ساعات

قلت أكلم أخويا

افتكرت إنه طلع معاش مبكر

وكاره تاريخه

ومركز في التأمينات

أكلم أختي

هاتعيد وتقول نفس الحكَايات

أكلم خالي

افتكرت إنه غتت غتاتة

ومعايا أنا بالذات

أكلَم خالتي

قلت يا واد

دى كانت خالتى وخالتك

واتفرقّت الخالات

أكّلم صاحبى صلاح

افتكرت إنة سافر العراقُ

وفى إحتمال يكون مات

قُلت أنا أصطاد مُزة

واعمل دماغ

بسّ معرَفش حد بتاع مُخدَّرات

قُلت أمشى ف مظَاهرة

لقيت العساكر راجعين

مشَطبين علَى كل الُمظاهرات

قُلت اتصل بالسّادة المسئُولين

هايتّهمونى بإزعاج السُّلطات

قُلت ياربّ

هُو أنا إيه

وليه

ونسيت إيه

وقطر إيه اللّى فات

اَلَلًه يرحَمَك بقَى يَابَا

والفاتحة عَلَى كُل الأموات

الأهلي وطنطا

الأهلي وطنطا

يميِن حاضر

شمال حاضر

ماهو السواق جدع شاطر

يسوق دوغرى

وعند نزلة الكوبري

لقينا روحنا مش فاهميِن

مفيش ميه ولا بنزيِن

قلعنا الصبر والفساتين

والدنيا هيصة

والزحمة ورطة

ومعدش ينفع تتصلح الغلطة

وأنا كل خوفي

يفوتني ماتش الأهلي وطنطا

في كاس مصر

أشرب

أشرب



عرفاك .. عرفاك

هاتلف تلف

وفِى الأخر جاى

سمعاك

بتقولِ ضمينى

سامحِينى

لأ يا روح أمك

مَبقَاش

عيان

تعبان

مديون ومفلس

ما أنا مديت إيدى للى يسوى

واللى ما يسواش

لا عندى بن

ولا عندى قطن

ولا عندى شاش

ضحكوا عليك

وقالولك خللى السلاح صاحي

وهما طول الليل والنهار نايمين

وانت طول عمرك

بِتبيع ببِلاش

اشرب

وش القفص

وش القفص


علي فكرة

إحنا يادوب بس الشوية

اللي علي وش القفص

بدل وكرافتات

وكام شارع ومدارس لغات

أما القعر

لا دقن ولا شنب

ولا شعر ولا أوصاف

اطلع واتفرج يا معلم ع الأطراف

عندنا قري وشوارع وبيوت

كل دقيقة بتموت

لا ميه ولا نور

ولا حلم ولا رجل ولا لحاف

اتفرج يمكن تتخض

ولو لسه بتحس بجد

أكيد هاتخاف

ورد وشمع

ورد وشمع

جابت ورد وشمع..


وظبطت الإف إم..


وطفت النور..


وقالتلي..


وأنت معايا بتحس بإيه..


قلتلها ولا حاجة..


قامت.. ولعت النور


وراحت غابت حبة..


ورجعت سألتني برقة..


طب لما بغيب عنك..


بتحس بإيه..


قلتلها برضه ولا حاجة..


قالتلي بجد..


قولتلها أمال هزار..


قالتلي..


والنيلة الأغاني اللي بتكتبها


والزفت الأشعار..


قلتلها بس أمي قالتلي..


اللي بيكدب بيروح النار..


بصتلي من فوق لتحت

بكل احتقار..


وقالتلي


ابقي خللي أمك تنفعك..

ميدان العتبة

ميدان العتبة

لما أنا والسرير بنتخاصم..


لا يمكن أرتاح ع الكنبة..


ولا ع الكرسي ولا ع الأرض..


ولما يومي بيبتدي..


من ميدان العتبة..


بعرف أد إيه يا حبيبتي..


إحنا لسه بعاد عن بعض..


ولما العلاج يبقي كله مسكنات..


بتتساوي كل الأوجاع..


الصداع..


زي المرارة..


وسرطان..


زي نزلة البرد..


المهم..


يوم التلات اللي فات..


كان يوم حافل..


طول النهار بلف..


علي كالون ست تكات..


روحي ضايعة..


وقلبي قافل..


قالتلي بحبك..


قلتلها مش سامع..


قالتلي وحشتني..


قلتلها مش شايف..


قالتلي إنت سافل..


سكت ومشيت..


زي ما بتمشي كل المسائل..


تسرقني من تاني..


نفس الحاجات..


وكل ما حس بالألم..


أقول لقلبي تستاهل..


آد إيه يا حبيبتي عيونك..


جميلة أوي وصافية..


لكن ميدان العتبة..


ديما يفكرني..


إني لسه..


في العشق جاهل..

من بعيد

من بعيد




بَقيِتْ أخَاف

من طَبيِب الأسْناَن

ومِن كل الطيور

حتَى الكَرَوان

وم الشَّاى اللى ف الدكان

وم السُكروم الحَادق وم الحراق

وم الحَلاق

منْ العسكرى وم الأُتوبيسْ

ومِن إبليس

من الشَّارع والرَّصيفْ والرََّغيفْ

وأخويا الضعيف

وقَطر السَكَة الحَديدْ

مِش هو القمح برضه

زَمَان كان لُه عيد

وكَان لهُ غنوةْ حَلْوة

وف كِتاَب الأناشيد

بَحبِكْ يا بَلَدْنا

بَس من بِعيِد لبِعيِد

مفيش كوكو

مفيش كوكو

آخر كلام يا عم..

طعام..

يعني مم..

يعني علي سبيل المثال..

سندويتشات..

وأرجوكو..

ماحدش يجيب سيرة الكوكو..

قدام العيال..

وكوكو للي مش عارف..

يعني دجاج..

يعني شوربة..

يعني ظفر..

معقول ده محتاج..

عقد عمل..

وغربة..

وسفر..

عارف..

لسه شوارعنا بتخاف من المطر..

ومطر للي مش عارف..

يعني خير..

إزاي ف بلدنا الخير..

أصبح خطر..

مفيش حد

مفيش حد





مَحَدَّشْ فيِْنا قَامْ الصُبْحْ يتمطَّعْ...

وقالْ نِفسىِ أطْلعْ القَمَر...

ولا حَدْ فيِنْاَ بيْغيِرْ...

منْ العَصَافيرْ الحُرةَّ ع الشَّجَرْ...

ولا حَدْ فِينَاَ إنْدَهَشْ

م السُؤالْ والخَبرْ...

عايِشينْ بَسْ كدهْ...

عَاَلة ع البَشَرْ...

هىَّ الَمراكِبْ للْهُرُوبْ

ولاَّ السَّفَرْ...

لو عِشْنا نَسْتَنى المَطَرْ...

هَنْمُوتْ أَكيْدْ عَطشانينْ...

هوَ إحْنا مِينْ...

مطلوب عروسة

مطلوب عروسة

مطلوب عروسة طيبة




ومتعلمة ومؤدبة




ومؤمنة بالقضاء والقدر




سنها من سني




أصغر أو أكبر مني




مش هنختلف




المهم مبتعرفش تطبخ




عشان مش هقدر أجيب




أي حاجة تنفع للطبيخ




وتكون بتحب القراءة




وتهوى الرحلات




وتعشق السفر




مش عضو في أي حزب




وطبعاً عارفة ان الكدب حرام




بتحب الكورة ..




مهمومة بالدوري العام ..




وملفوفة القوام ..




حلوة وزي القمر ..




شعرها ناعم حرير ..




ملهاش أي مصلحة




فـــ شارع القصر العيني ..




أو مجمع التحرير ..




وفاهمة كويس ميدان الجيزة ..




مش متابعة جلسات مجلس الشعب




ولا بتسمع البيان الختامي




لأي مؤتمر ..




وتكون من عيلة بتشتري راجل




لا عايزة شبكة ولا مهر ..




وأنا بقى .....




خبرة في المرمطة ..




وجميع أشكال القهر ..




مواطن من إنتاج مناهج




وزارة التربية والتعليم ..




ثانوية عامة ...




النظام القديم ..




أيام الأرنب الغضبان ..




والخس والجزر ..




وزي النسمة والله ..




يعني تعتبرني من دلوقتي




مش موجود ..




لا حس ولا خبر ..




بس مخي نضيف ..




وعاقل ورزين ..




وعندي شوية نظر ..




ورغم إني ياما أتزحلقت ..




لكن لسة بفرح بالمطر ..




على فكرة .......




أنا حاجز شقة بحري




أربعين متر ..




أخر طريق الواحات ..




بس لسة محطوش الأساس ..




عشان تقريباً ..




مش لاقيين الحجر ....

مصر والكاميرون

مصر والكاميرون



بقول لهم


مين اللي بيعيط بحرقة دة؟


قالوا لي


مواطن اتصور وهو بينضرب


قلت لهم


ومين الأمور اللي بيضحك دة؟


قالوا لي


دة واحد عمل شوية كوارث وهرب


قلت لهم


والدنيا عتمة هناك كدة ليه؟


قالوا لي


دي حتة جديدة بتتخرب


قلت لهم


ومين الحاوي اللي بيتكلم دة؟


قالوا لي دة الوضع بيتقلب


وايه الهيصة اللي في الساحل الشمالي دي؟


قالوا لي


دي البقرة بتتحلب


قلت لهم وانتوا قلقانين كدة ليه؟


قالوا لي اصل بنلاعب الكاميرون


وخايفين نتغلب

مصاريف المدرسة

مصاريف المدرسة

البنت بنتي..


كل يوم تكبر سنين..


حلوين عينيها..


بس ليه..


مش فرحانين..


في السن ده..


وبتقول كلام..


ليه لما تصحي..


بكون بنام..


حاولت أقرب منها..


لاقتني مش عارف أنا..


أبقي مين..


وفتحت قلبي يقولها..


ملقيتش غير..


مصاريف المدرسة..


وفلوس المدرسين..

مش دي بطاقتي

مش دي بطاقتي

مش دى .. بطاقتى

وده .. رقمى القومى

ودى .. الحقيقة ..

وده الخيال ....

ومش دي الخريطة ..

ودي المدينة ..

وده المحور ..

وده المترو ..

وكده يمين .. وكده شمال ..

مش ده ظابط .. وده عسكرى ..

وده طبيب .. وده كمسرى ..

وده منجد .. وده بقال ..

مش ده جامع .. ودى مدرسة

وده بيت دعارة ..

وده سمسار ..

وده شيال .....

مش ده فستان .. ودى جلابيه

وده شورت .. وده مفيش ..

وده شال ....

مش ده اتوبيس .. ودى عجلة

ودول حمير ....

ودولا جمال .....

مش ده عمى .. ودى أختى

و دول صحابى ..

وده كمال ....

مش ده شارعنا .. وده بيتنا ..

ودى مراتى ..

ودولا العيال ...

مش ده الوطن .. وده المواطن ...

وده التاريخ .. اللى إتقال ...

أمال ليه .. كل ما اروح فى حته

و أسأل سوأل ....

يقولولي .. جايز ... يمكن .... إحتمال

مش بتاع كده

مش بتاع كده

لما أنا مش بتاع كده..

ولا بتاع كده ولا كده..

أمال أنا بقي..

أبقي بتاع إيه..

لما أنا مش شيخ..

ولا فلتان..

لما أنا مش فايق..

ولا سكران..

وساعات يتهيألي..

إن أنا فرحان..

أتنطط وأصرخ..

وأقول هيه..

لما أنا مش أفندي..

ولا فلاح..

ولا شجرة جميز..

ولا تفاح..

لا أنا بتألم ولا مرتاح..

لا عندي شيء استناه..

ولا عندي شيء أبكي عليه..

ولما أنا شايف الحال بقي كده..

طب ساكت ليه..

يا عم أنا مش بتاع كده..

فيه إيه!

مرايا

مرايا


قلت أبص ف المرايا ..

يمكن أكون إحلويت ..

فضلت داير أبص ..

مخلتش ولا مرايا ف البيت ..

في الحمام ف الأودة ف دولاب ..

أو متعلقة ع الحيط ..

شوفت ..

سكت شويه ..

وبعدين إتخضيت ..

معقول أنا قضيت العمر ده كله ..

وزي ما روحت زي ما جيت ..

معقول أنا عمري مافكرت

ولا إتغيرت ولا حبيت ..

وإزاي ساكت علي روحي ده كله ..

وليه إستنيت ... !

يا ريتني ما كان عندي مرايا ..

وياريتني ما بصيت ..

ربنا يسهل

ربنا يسهل

بقول لها..


بحبك بحبك بحبك..


قالتلي..


كل ده كذب..


قولتلها صدقيني..


لا أنا في المعارضة..


ولا ف الحزب..


قالتلي..


بس السكوت خيبة..


ولولا العيبة..


كنت أقول..


وأقول كمان..


الله يرحمك بقي يابا..


ويا ميت خسارة ع الجدعان..


قولتلها وطي صوتك..


بلاش جنان..


كل الحكاية..


أنا حاسس بشوية سخونة..


وبردان..


اديني بس إنتي شوية حنان..


وربنا يسهل..

لب وسوداني

لب وسوداني


بقول لها ..

ما تيجي نهزر ..

نجري ونلعب ..

ونكسر كل الحاجات ..

ونجيب م اللي فات ..

يومين حلوين ....

قالتلي والنبي إنت فايق ورايق ..

قولتلها ...

طب وليه نتضايق ..

إحنا لسه صغيرين ..

وأكبر عيالنا ..

يا دوب تسع سنين ..

يعني لو بنحكم مصر ..

تبقي يا دوب لفة ونص ..

مش عشرين ..

- وطي صوتك البت بتذاكر ..

والواد مصدقت إنه نام ...

إنما إيه اللي صحي ف قلبك ..

من تاني الغرام ..

قولتلها جوايا كلمتين غزل ..

قالتلي والنبي إنت عسل ..

بس الظروف ..

- مالها الظروف ..

فاكرة لما كنتي ..

بتحوشي م المصروف ..

جبتيلي ورد ف عيد ميلادي ..

- وجبتلك بلوفر صوف ..

- وجبتيلي بلوفر صوف ..

- فاكر لما بوستني ..

وإحنا لسه مخطوبين وأبويا لاحظ ..

يالهوي كنت هموت م الكسوف

- فاكرة أول مرة قلت لك بحبك ..

وشك إحمر ..

- إنت اللي وشك كان مخطوف ..

- مش إنتي كنتي بترسمي زمان ..

- وإنت كمان كنت بتكتب شعر ..

- هو احنا بطلنا نحس ..

- إحنا بطلنا نشوف ...

وطلعنا اللب والسوداني ..

وفتحنا التليفزيون ..

وسكتنا تاني ..

ولا زال السبب ..

غير معروف ..

غير معروف

كيس بلاستيك

كيس بلاستيك

من كتر ما الحزن رطرط..


مبقاش خلاص يتحس..


فضلت الأحلام..


تتقص تتقص تتقص..


لحد ما بقت ف النهاية..


رغيف..


وكيس بلاستيك.


وبس..


عارف..


بصحي قلبي..


عشان يحب..


قام بقرف..


واتلفتلي وبص..


ورجع نام تاني..